એટલામાં તો ક્યાં છે દુષ્કર લાખ ટુકડા કાચના ?

એટલામાં તો ક્યાં છે દુષ્કર લાખ ટુકડા કાચના ?

એક સપનું : એક પથ્થર : લાખ ટુકડા કાચના.

સ્હેજ ભીનું શ્યામ અંબર, લાખ ટુકડા કાચના

ઘાસમાં વેરાય આખર લાખ ટુકડા કાચના.

ધૂળિયો રસ્તો, ખભા પર શેરડીની ગાંસડી.

ડૂબતો સૂરજ, ત્વચા પર લાખ ટુકડા કાચના.

છ ઘણા નાના તફાવત માત્ર દ્દષ્ટિકોણના,

રત્નના ઢગલા બરાબર લાખ ટુકડા કાચના.

રાહ તારી જોઉ છું દર્પણના સીમાડા ઉપર

આવવા તો ક્યાં દે અંદર લાખ ટુકડા કાચના.

શક્ય છે બે યુગની વચ્ચેના સુલભ એકાંતમાં….

બેસી ગણતો હોય ઇશ્ર્વર લાખ ટુકડા કાચના.

કંઇક વસ્તુઓ ફક્ત દેખાવથી બનતી નથી,

ક્યાં રચી શકતા સમંદર લાખ ટુકડા કાચના.

જિંદગીને સ્થિર કશો આકાર કઇ રીતે મળે ?

સ્થાન બદલે છે નિરંતર લાખ ટુકડા કાચના

- હેમેન શાહ