મયભરી મદમસ્ત આંખો છે, શરાબી ભૂલ કર

મયભરી મદમસ્ત આંખો છે, શરાબી ભૂલ કર

એના હોઠોને અડીને એક ગુલાબી ભૂલ કર

સરહદો પાંપણની તોડી, એ વસી ગઈ સ્વપ્નમાં

જો, પહેલ એણે કરી, તું બસ જવાબી ભૂલ કર

ભૂલ બુજદિલ આગિયા જેવી તો પકડાઈ જશે

જા, તું ખૂલ્લેઆમ જઈને આફતાબી ભૂલ કર

ચહેરો દેખાડી અરીસો રોજ રંજાડે તને

તું પણ એને છળ કદી, જા, એક નકાબી ભૂલ કર

ઉરમાં ઈચ્છાઓને જણતું એક ધબકતું યંત્ર છે

એના તાબે ના થવાની ઇન્કિલાબી ભૂલ કર

- હેમંત પુણેકર